• Huvudmeny

mars 2008

Baltiska rakkrepa

Dolle baltiska rakkrepana aschar an dy lodipas, väst- ta östbaltiska. Sas västbaltiska rakkrepa ashar avriske-mulo, ta nani nane dolle sensloaste avri dovas, preussiska, kammar rakkrats pala 1600-bersch.

Lettiska ta litauiska ashar östbaltiska rakkrepa, ta honkar buttider narta ninna varvara. Lettiska honkar officiellt rakkrepa dre Lettland. Kava rakkras attjer ca 1,5 miljoner manusch, ta savi butt tjakkes 100 000 boddrar nani an Lettland. Lettiskan kammar trin cheroske-dialekter, ta randre-rakkrepa tjakkes avar fann kava dialekt tjakke rakkras an preleske Lettland. Dolle vagerste bokkas pre lettiska randras pre 1500-bersch, ta develske-bokkan to lettiska pre 1600-bersch honkar jekh avri dova baroa tjiro-tattjoa gla randres-rakkrepas avriske-mengrepa

Laveske-betoningen pachar pre lengros vageste lav, Savo tjattjo-sikklo ashar pala te lalliaro-ugriska rakkrepa, kammar liviska, kammas preverkat lettiskan. Liviskan kammar pre vavera tjakk preverkat pennepat dre lettiskan, savo te dolle lettiska pennepat paschar duri fann litauiskans pennepa. Litauiska honkar officiellt rakkrepat dre Litauen. Kava rakkras attjer ca 3 miljoner manusch, ta savi butt tjakkes 100 000 boddrar nani an Litauen. Litauiskan kammar dy cheroske-dialekter, ta randre-rakkrepa tjakkes avar fann dialekt tjakke rakkras väster pala foron Kaunas. Dolle vagerste bokkas pre litauiska randras pre 1500- bersch.
Litauiskan pennar beddos pennepa savot asha jekh attjer dova buttides konservativa indoeuropeiska rakkrepan, ta dolle aschar kava rakkrepa tjakke paschar karnast dolle rekonstruerade indoeuropeiska ur-rakkrepana. Dolleske ashar litauiskan tjattjano andre dolle mengrande språkvetenskapen.

Drabbra buttider pre Wikipedia: lettiskalänk till annan webbplats ta litauiskalänk till annan webbplats.

Uppdaterad 09 juni 2014