• Huvudmeny

Diro horta te brukfara nationelli minirotetiske-racklepha

Aschar diro attjer konn attjer dova nationelli minoriteteterna kammar diro hortan te brukfara diro racklepha an kontakti ninna beddoskemanisch. Akaj fyssa diro jana saro rackelpha hortepha diro kammar ta saro doschtalopha diro nacht penna pre diro kommuni ta pre vavver beddoskemanisch.

Dova 1 januraio 2010 avade jeck nevo horta baschi nationelli minoriteti ta minirotetiske-racklepha. Savo nationelli minoriteti jinnas Byskroar, Samer, Lollothemmare ta tornedalingar. Dova nationelli minoritetiske-racklepha ashcar Jiddisch, romani (romani chib/ romaniracklepha), samiska, finska ta meänkieli.

Sass nationelli minoritetiske-racklepha sass kerras gla

Hortan pennar te dova nationelli minoriteteske-racklepha saste kerras gla . Dovan savo aschar jeck nationelli minoritet saste kammar hortan te jana baschi siro racklepha, kerra buttare ta brukfara siro minoriteteske-racklepha. Beddoskemanischen saste schunna pre dova nationelli minoriteter ta schunna pre dovas golepha ta dynkrar.

Beddoskemanischen kammar doschtalopha te infomeri diro baschi diro hortepha, tji dynkrat saro nationelli minoritiske-rackelpha diro racklar ta sar diro boddrar an Sveddingen.

Buttast soralo hortepha gla finska, meänkieli ta samiska

Buttast soralo hortepha kammar dovan savo racklar finska, meänkeli ir samiska ta boddrar an jeck kommuni an jick kerrandethemm (jick administrativo themm, savo regeringen kammar andrekerrande preal siro beddoskemanisch) Duriast nickli pre patrinen nascht diro jura baschi diro kommuni aschar an jick kerrandethemm.

Diro savo boddrar an jeck kommuni an jick kerrandethemm kammar hortan te kommuniceri ninna beddoskemanisch pre diro racklepha. Diro saste nachta fussa svardara an rackel ta rander pre savrige racklepha.

Diro nacht penna gla te fussa nucko- ta puranohilprepha helko ir bekkanskepha pre finska, meänkeli ir samiska.

Boddrar diro an nonn attjer kommunierna Kiruna, Gällivare, Arjeplog, Jokkmokk, Haparanda, Pajala ir Övertomeå kammar diro horta te brukfara minoriteteskeracklephat an kontakti ninna hortephakeret. 

Diro savo boddrar an jeck kommuni savo tji aschar an jick kerrandethemm saste nachta kontakta beddoskemanisch ta fussa puranohilprepha pre finska, meänkieli ir samiska, baschi dolle aschar mengmanisch savo nacht rackla dolle racklephat. Beddoskemanischen saste jura to dolle aschar racklephajanade mengmanisch karni dolle aschar vekto.

Tji dynkrat sar diro boddrar saste diro sarstil nachta randra pre finska, meänkeli ir samiska, to riksdagens beddoskemanisch, Justitkanslerna, försäkringskassan, skatteverket ta diskrimineringsombudsmannen.

Akaj nacht diro fussa hilprepha

Baschi diro dynkrar te diro kommuni ir vaver beddoskemanisch tji jibbar uppri to hortan nacht diro kontaka Länsstyrelsen an Stockholms themm ir Sametinget savo saste jura to te hortan kerras. Sametinget doschtaloar gla samiska ta Länsstyrelsen an Stockholm doschtaloar gla dova vaver racklepha. 

Enheti gla minoritetiske – friggor nerrider Länstyrelsen an Stockholms themmlänk till annan webbplats

Tavjinner: 08-785 40 00

Sametingetlänk till annan webbplats

0980-780 30

Akaj nascht diro bleddra buttare

Akaj fussar diro jana buttare baschi diro hortepha:

Kerrandethemm gla finska, meänkieli ta samiska

Akaj nacht diro jura saro kommuner savo aschar an dova ovaro kerrandethemmen. Vevet kommuner nacht penna gla bliddra jick kerrandethemm.

Kerrandethemmen gla Finska

Borlänge, Borås, Botkyrka, Degerfors, Enköping, Eskilstuna, Fagersta, Finspång, Gällivare, Gävle, Göteborg, Hallstahammar, Haparanda, Haninge, Hofors, Huddinge, Håbo, Hällefors, Kalix, Karlskoga, Kiruna, Köping, Lindesberg, Ludvika, Luleå, Malmö, Mariestad, Motala, Norrköping, Norrtälje, Nykvarn, Oxelösund, Pajala, Sandviken, Sigtuna, Skinnskatteberg, Skövde, Smedjebacken, Solna, Stockholm, Sundbyberg, Sundsvall, Surahammar, Södertälje, Tierp, Trelleborg, Trollhättan, Trosa, Upplands Väsby, Västerås, Uddevalla, Umeå, Upplands-Bro, Uppsala, Älvkarleby, Örebro, Österåker, Östhammar och Övertorneå.

Kerrandethemmen gla samiska

Arjeplog, Arvidsjaur, Berg, Dorotea, Gällivare, Härjedalen, Jokkmokk, Kiruna, Krokom, Lycksele, Malå, Sorsele, Storuman, Strömsund, Umeå, Vilhelmina, Åre, Älvdalen och Östersund.

Kerrandethemmen gla meänkieli

Gällivare, Haparanda, Kalix, Kiruna, Pajala och Övertorneå.

Uppdaterad 03 februari 2015